Aurreko urtean egin bezala, aurten ere herritar talde batek, Ongi Etorri Errefuxiatuak Plataformako kideak direnak, antolatu dute Argi izpi bat itsas ilunean jardunaldi berezia. Atzo eman zioten hasiera; kultur etxean Radio Kobani dokumentalaren proiekzioa egin zuten, eta bertan izan zen Maryam Fathi aktibista eta Kurdistango errefuxiatua, herritarrekin solasean.
Karpa gaur, Joseba Barandiaran plazan
Gaur eta bihar jarraipena izango duten jardunaldi hauek, helburu dute «errefuxiatuen eta giza eskubideen inguruko ekintza eta testigantza desberdinak batzea».
Atzo izan zuten aurrenekoa, eta gaur izango da, ordea, egun haundiena. Eguraldi txarra espero dela eta, karpa bat jarriko dute Joseba Barandiaran plazan eta bertan burutuko dituzte ekintza guztiak.
Eguerdiko 12:00etan hasiko dira ekintzak, ONGen aurkezpenarekin, eta hainbat errefuxiatuen testigantzekin. Ondoren izango dira jan eta edatekoak, eta musika zuzenean. Arratsaldean jarraituko dute aurkezpen eta esperientziek, baita azkeneko kontzertuak ere; Apalatxe taldeak eskainiko du hori.
Bihar eskainiko dute azkeneko dokumentala: Zuk. Arratsaldeko 18:30etan izango da, bertan hartuko dute parte zuzendariak, produktoreak eta Maydayterraneo Proiektuko kide batek.
«Ongi etorri errefuxiatuei, doazen lekura doazela»
Jardunaldi hauekin Plataformak aldarrikatu nahi duena da: «errefuxiatuek eta erbesteratuek gure bizitzara ikuspegi aberats berri bat dakarkigute. Beraiekiko tolerantzia eta elkar ulertzeak mundu berrietara begiak zabaltzeko aukera ematen digute. Ongi etorri errefuxiatuei, doazen lekura doazela ere», azaldu dute prentsa-ohar bitartez.
Gaur,
- 12:00: Honek, Munduko Begiak eta Teresa Dupuoy ONGen informazioa. Baita Txiapasen emakume indigenekin lanean ari den Kinal Antsetik taldeko kideen esperientzia.
- 13:00: Pintxoak eta sagardoa.
- 13:30: Makulu Ken Euskalafrobeat musika taldearen kontzertua.
- 17:30: ‘Mugak Zabalduz Karabana’ ekimenaren aurkezpena.
- 18:00: Herrialde desberdinetako pertsonekin elkarrizketa: Siria, Palestina, Eritrea, Sahara, Txiapas.
- 20:00: Munduko Janariak.
- 21:00: Apalatxe taldearen kontzertua.
Bihar,
- 18:30: ‘Zuk’ dokumentalaren proiekzioa. Solasaldia: zuzendaria, produktorea eta Maydayterraneo Proiektuan parte hartzen ari den kide bat.