Oso kritiko azaldu da Hernaniko EAJ-PNV, 2018rako Udal Aurrekontuen proposamenarekin; eta aurreratu du, ez dituela babestuko. Osoko zuzenketa aurkeztu die aurrekontuei.
Udal taldeak adierazi du, hainbat direla aurrekontuak ez babesteko arrazoiak, baina bi nabarmendu dituzte bereziki. «Batetik, jasotzen da hernaniarrek 2.876.000 euro ordaindu behar dituztela atez atekoaren bilketa eta tratamenduagatik; eta defizita 257.052 euro haunditu da. Hori gertatu da bi konturengatik: hondakinen tratamenduaren kostua haunditu delako, Epeleko konpostagailua ezin izan delako martxan jarri; eta Astigarragak Garbitania utzi duelako, EAJ alkatetzara iritsi ondoren. EH Bilduk gobernatutako hiru Udalek sortu zuten Garbitania, eta orain, Usurbilek eta Hernanik asumitu behar dute bere gastu osoa».
«Udalbiltzari aportazioa, 15.000 eurotik 45.000 eurora haunditu da»
EAJk aurrekontu proposamena ez babesteko beste arrazoi nagusia, Udalbiltzari egiten zaion ekarpena da: «2018 urtean %200 haundituko da Udalak Udalbiltzari, EH Bilduk gobernatutako herrien elkarteari, egiten dion ekarpena; 15.000 eurotik 45.000 eurora haunditu da. Hernaniko alkatea da elkartearen presidentea. Nabarmentzekoa da, 3.006 euroko aportazioa egiten zaiola EUDEL udalerrien elkarteari, non alderdi politiko guztiak dauden».
Bi aspektu horiek kritikatu ditu EAJk: «EH Bilduk gobernatutako udal entitate suprak, hernaniarrak odolusten ari dira», salatu du Andoni Amonarraiz bozeramaileak. Eta aurreratu du, jarraituko dutela hernaniarrak informatzen, «ahal dugun guztian».
Osoko zuzenketa horretan, EAJk adierazi du, «gero eta bide gutxiago» ikusten dituela EH Bildurekin akordioetara iristeko, «bere politika egiteko modua ikusita». Horrela, azaldu du, aurkeztu diren aurrekontuen aurrean, «betiko arazoak» ikusten dituela: «izendapen askeko langileak mantentzea; oposizioko kideak bigarren mailako langiletzat hartzea; zuzeneko erosketen sistema berberarekin jarraitzea; Kaxkoan dauden arazoekin, oraindik ez haunditzea udaltzain kopurua; harrobiko basoaren garapenari buruz ez da ezer aipatu; irisgarritasunaren partida %47 murriztu izana...».