Kinielak ez dauzka alde, baina gogorik ez du faltako Unai Agirrek, Bertsolari Txapelketa Nagusiko finalean sartzeko. Gaur dauka saio erabakigarria, horretarako: finalaurrekoen azkeneko saioa izango da Iruñan, 17:00etan hasita, Anaitasuna kiroldegian.
Zaila dauka Agirrek, finaleko bigarren hernaniarra izateko. Plaza bat lortzeko lehian, atzerago dago (667,5 puntu aurreneko itzulian), eta saio borobila beharko du horretarako.
Hobeto daukana Aitor Mendiluze da, aurreko saioan 740,5 puntu lortu ondoren. Gaur saio txukuna egitearekin, finalean izango da andoaindarra.
Iruñan ariko diren beste lau bertsolariak dira, Aitor Sarriegi, finala oso gertu daukana (705 puntu); Miren Amuriza (678,5) eta Oihana Iguaran (671), zazpigarren plaza lortzeko hautagai nagusietakoak; eta Alaia Martin (651), zailago daukana.