Emakumeenganako Indarkeriaren Aurkako Nazioarteko Eguna ospatuko du Astigarragak ere, urtero bezala. Eta hiru eguneko jardunaldiak prestatu ditu Harituz elkarteak, horretarako: «sentsibilizazio jardunaldiak dira, baina nahi dugu baita ere, Astigarragak ikustea kanpoan jaso dugun maitasuna», azaldu zuen Isabel Otero elkarteko presidenteak, atzo egin zuten aurkezpenean.
Izan ere, penintsula osoan zehar ibili ondoren, herrira bueltatuko da matazak ekimena, jardunaldi hauetan. «Toki askotatik jaso ditugu puskak, mataza osatzen joateko. Familia haundi bat gara, eta harremanetan gaude uneoro, elkarrekin ari gara lanean. Solidaritate adibide bat da matazak; izugarria da emakumeon artean daukagun batasuna».
Mataza osatzen lagundu zuten, duela hiru urte beraien puska bidalita, Tunezeko Association Tunisienne de Lutte Contre les Comportements à Risque elkarteko emakumeek. Eta orain, bisitan izango dira Astigarragan, jardunaldietan; azaroaren 23tik 25era.
Emakume tunisiarren hitzaldia, ostegunean
Hain justu, beraien hitzaldi batekin emango zaie hasiera jardunaldiei, ostegunean, arratsaldeko 18:30etan kultur etxean.
Baina larunbatean izango da egun nagusia, 25ean. Herriko kultur taldeek eta Matazak Familiak hartuko dute hitza goizean, eta sagardo eta pintxo dastaketak, eta bazkari herrikoia izango dira gero. Indiako Stop Acid Attacks ONGkoak ere egongo dira bertan.
Zorione Etxezarraga alkateak nabarmendu zuen, «bide oso oparoa» egin duela Harituzek, sortu zenetik: «bere burua apaltzat daukan elkartea da, baina daukan indarra ikaragarria da», adierazi zuen.