Babesa eta asiloaren inguruko sentsibilizazio jardunaldiek gaur eta bihar izango dute segida. Izan ere, SOS Arrazakeriak, Hernaniko Kooperazio Taldeak eta Hernaniko Udalak antolatuta, ekitaldi bana izango da bi egun hauetan.
Alde batetik, gaur arratsaldeko 20:30etan hasita, La Zanja antzezlanaren emanaldia izango da Biterin. CEAR Euskadiren eskutik, errealitate eta esperientzia gordinen bitartez babes bila daudenen egoera azaldu nahi da antzezlanean.
Eta, bestetik, Esperientziatik elkarrizketa mahai-ingurua antlatuko da bihar arratsaldeko 19:00etan, Biteri kultur etxean. Mahaiaren bueltan ondorengo hauek izango dira: José Palazón, PRODEIN gobernuz kanpoko erakundearen presidentea; Javi Julio kazetari donostiarra; Mireya Prea, Bachue kolektiboko ordezkaria; eta Candida Okomo, Ekuatore Gineako errefuxiatua.
Erakusketa, abenduaren 10era arte
Ongi etorri errefuxiatuak erakusketak pasa den azaroaren 20an zabaldu zituen ateak, eta abenduaren 10era bitarte luzatuko da. Eta, besteak beste, Siriako krisia sortu duten arrazoien inguruan eta pertsona errefuxiatuek egun bizi duten egoeraren berri ematea du helburu.
Erakusketa astelehenetik ostiralera 09:00etatik 22:00etara eta larunbatean 09:00etatik 13:00etara ikusi ahal izango da, Biteri kultur etxean.