Bihar goizerako jarri dute azkeneko zita, Ereñotzun, Udazken Kulturalaren barruan. Mendi buelta egingo dute, Artikutzan barrena, goizeko 09:30etan.
Bihar izango da ibilaldia, eta ez aurreko igandean; data oker azaldu zen, aurreko larunbateko Kronikan.
Haritzaldek gidatuta, animalien lorratzak ezagutzen
Haritzalde Natur Taldeak gidatuko du ibilaldia, eta animalien lorratzak ezagutuko dituzte bidean.
Biharko mendi buelta gidatua, bigarren partehartzea izango du Haritzaldek, Udazken Kulturalean. Izan ere, Urumeako fauna eta flora argazki erakusketa jarri zuten Ereñotzuko Auzo Udaleko aretoan, eta azaroaren 2tik hasi, eta joan den ostegunera arte egon da ikusgai, bertan; Jokin Lizeagaren hitzaldiko argazkian, ikus daitezke erakusketako irudiak, atzean.
Bi orduko hitzaldi atsegina, Jokin Lizeagak
Hain justu, Jokin Lizeagaren hitzaldia izan zen azkenaurreko saioa, Udazken Kulturalean. Bi orduko hitzaldia eskaini zuen mendi korrikalari urnietarrak, eta Auzo Udaleko aretoa bete zuten entzuleentzat, saio atsegina prestatu zuen. Ez zen mendi korrikalariei soilik zuzendutako hitzaldi teknikoa izan, guztientzako modukoa baizik.
Urnietarrak bere kirol ibilbideari, bizitzari, eta mendi lasterketen munduan hasteko arrazoiei buruz hitz egin zuen hasieran, eta mundu horri buruzko azalpen eta datuak eman zituen gero.