Astebeteko atsedenetik bueltan, Landaren jokatuko du berriro, Hernanik. Bihar izango da, eguerdiko 12:00etan hasita, eta kontrario gogorra etorriko da bisitan. Santboianaren kontra neurtu beharko dituzte indarrak trikoloreek.
Ez zuten esperotako hasiera izan kataluniarrek, denboraldi honetan; aurreneko hiru partiduak galdu zituzten. Baina badirudi eman diotela buelta, eta azkeneko bost partiduetatik, lau irabazi dituzte.
Hernanik, bere aldetik, puntuak pilatzen jarraitu beharra dauka; Getxo azkenekoa are eta gehiago urruntzeko, batetik; eta 11garren postua saihesteko lehian, La Vila eta Cisnerosi aurrea hartzeko, bestetik. Une honetan, La Vilarekin berdinduta daude hernaniarrak, 12 punturekin, eta 14rekin dago Cisneros, bederatzigarren.
Igor Genua, ‘seven’ selekzioko kapitaina sasoi honetan
Bestalde, Espainiako zazpiko selekzioak aste honetan aurkeztu du denboraldi berria, eta tartean izango da Igor Genua hernaniarra ere.
Gainera, taldeko kapitaina izango da Genua, denboraldi honetan: «elitera iristeko bidea luzea, zaila eta gogorra izan da, eta harro nago taldea gidatzeaz, munduko onenen kontrako lehian», adierazi du.