Herrian bertan geratu daiteke aurten, Hernaniko Xake Txapelketako txapela. Bihar jokatuko da azkeneko jardunaldia, arratsaldeko 16:00etan Kixkal tabernan; eta irabazteko lehian bete-betean sartuta daude bi hernaniar: Ketxus Navascues eta Udo Esnaola.
Sailkapen nagusiko aurreneko postuan daude biak, Javi Corral andoaindarrarekin batera; hiruak, 4,5 punturekin berdinduta. Puntu erdira daukate Roberto Pinilla, baina irabazteko aukerarik gabe ia.
Hiruen artean jokatuko dute txapela, beraz, eta horretarako, ezinbestekoa dute biharko partida irabaztea. Oxan Altuna izango du aurkari Navascuesek, Julian Romeroren kontra ariko da Esnaola, eta Pinillaren kontra Corral.
Txapelketa azkarra eta irekia, haurrentzat
Helduen azkeneko partidekin batera, haurrek ere izango dute aukera, jokatzeko. Dagoeneko bukatu da beraien txapelketa, Ekaitz Devesaren garaipenarekin. Baina beste bat jokatuko dute bihar, Kixkalen bertan, ordu berean: xake txapelketa azkarra.
Irekia izango da, eta beraz, parte hartzeko aukera dute nahi duten guztiek, ez soilik txapelketan aritutakoek.