Partidu garrantzitsua dute gaurkoa, Endika Barrenetxea hernaniarrak eta Aritz Etxeberria azpeitiarrak, Binakako Txapelketan. Semifinaletara pasea dute jokoan, Urriza eta Agirrezabalaren kontra; Galarretan, 16:00etan hasita.
Galdu egin zuten Barrenetxeak eta Etxeberriak, ostegunean, bigarren jardunaldiko partidua, Ezkurra II eta Endikaren kontra. Partidu estua izan zen, dominatzailerik gabekoa, baina kontrarioak nagusitu ziren azkenean (38-40).
Edozein kasutan, bigarren jarraitzen dute sailkapenean, sei punturekin; gaur aurrean izango duten bikotearekin berdinduta, hain justu. Hori horrela, ligaxkako lider jarriko da irabazten duen bikotea (Matxin III eta Ion liderrek atseden hartuko dute), eta semifinaletara pasea lortuko du zuzenean.
Binakakoan bi partidu, gaur
Beste partidu bat ere jokatuko da gaur, Binakako Txapelketari dagokiona. Jaialdiko bigarren partidua izango da hernaniarrarena, eta hirugarrenean, txapelketako bi bikote ariko dira: Uterga eta Etxeberria III, Ezkurra II eta Endikaren kontra. Ligaxkako azkeneko bi postuetan daude sailkatuta, bi bikoteak.