Garraio Hiriaren proiektua berraztertzeari ekin diola jakinarazi zuen Gipuzkoako Foru Aldundiak urrian: «Astigarragako udalerria AP-8aren ingurubidearen bi aldeetan aurreikusitako kamioientzako aparkagune eta atsedenaldi-gunea».
Horren inguruan, hain zuzen, mozioa aurkeztu zuela iragarri zuen EH Bilduk. Horren aurrean, «mozio alternatiboa» egin du EAJ-PNVk, izan ere, beren ustez «goitik behera gezur galanta» kontatzen dute bertan.
«2015eko udaberrian Bidegiren bidez esleitu zen»
EAJk azaltzen duenaren arabera, EH Bilduren mozioak dio «2015ean proiektua bertan behera geratu zela». Baina beraiek diote: «ez da egia. Eta ez hori bakarrik: 2011-2015 legealdian, Garraio Hiriaren inguruabarrak aipatu ere ez dituzte egiten. Gauza jakina denean, Bilduren gobernuak Bidegiren bidez proiektua esleitu nahi izan zuela 2015eko udaberrian, baina ez zela enpresarik aurkeztu», azaldu dute.
Horregatik guztiagatik argi diote: «astigartarrei egia esan ordez, EH Bildu ipuina asmatzen ari da Gipuzkoako Foru Aldundiari dagokion azpiegitura horren informazioa ematerakoan».
Mozio alternatiboa, «gauzak nola izan diren azaltzeko»
EH Bilduren mozioaren aurrean, EAJ-PNVk mozio alternatiboa aurkeztea erabaki du, «gauzak nola izan diren azaltzeko».
Horrez gain, lau eskaera egiten dizkiote Foru Aldundiari: eremuan ingurumen azterketa egin dezala; gaur egun herrietan zehar aparkatuta dauden kamioiak garraio zentrora bideratzeko neurriak hartu ditzala; Udala behar bezala informatuta mantentzea; eta bertako garraiolarientzat aparkaleko kopuru bat gordetzea.
-Udala
Ohiko Plenoa, azaroa bukatzeko
13:30etan izango da, pleno aretoan.
Astigarragako EAJ-PNVk aurkeztutako mozioa, eta gai bera aztertzen duen Eh Bildurena, hain zuzen, asteazkenerako deitu duten Ohiko Plenoan landuko dituzte udal ordezkariek, eguerdiko 13:30etatik aurrera, Pleno aretoan.
Hamazazpi gai landuko dituzte bertan, tartean: 2018ko zerga ordenantza, Trafikoko Zuzendaritzarekin egin den hitzarmena, eta beste sei mozio.