Ostegunean eman zioten hasiera, Sagardo Forumaren bigarren edizioari, Orona Ideon. Irekiera instituzional batekin eman zieten ongietorria, bertaratuei, sagardoaren munduko arlo guztiak ikutzen joateko segidan, hitzaldiz hitzaldi.
Xabier Lertxundi Hernaniko Udaleko zinegotziak eman zion irekiera, eta guztiak gonbidatu zituen, «sagardoaren eta sagarraren munduan bezala, Hernanin ere barneratzeko». Zorione Etxezarraga Astigarragako alkateak, berriz, nabarmendu zuen «elkarrengandik ikasi eta elkarrekin lan egin» behar dutela, «nazioartean leku bat egiteko». Eta Gipuzkoako Foru Aldundiko zein Eusko Jaurlaritzako ordezkariek ere hartu zuten hitza, goraipatzeko sagardoaren munduan lanean ari direnek merezi duten errekonozimendua; eta aditzera emateko sagarraren eta sagarrondoen garrantzia.
Mundu osoko esperientziak ezagutzeko aukera
Horretaz aritu ziren, hain justu, hizlarietako batzuk. Aitor Etxeandiak, esaterako, azaleratu zituen bertako sagarrondoen arazo nagusiak (aldapa tenteetan daudela, hektarea gutxiko lursailetan daudela...); eta nabarmendu, ikerketa asko egiten ari direla, sagar barietateen ezaugarrien eta madurazio optimoaren inguruan.
Franz eta Magdalena Eggerrek, berriz, Italiako Sud Tiroleko esperientzia ekarri zuten. Sagarraren produkzioa oso haundia da han, urtean milioi bat tona; baina sagardoa egiteko ohiturarik ez daukate; orain hasi dira saiakerak egiten.
Jardunaldiek gaur izango dute segida, Nazioarteko Sagardo Lehiaketarekin. 12 herrialdetako 120 produktuk hartuko dute parte, guztira. 09:00etan hasiko da kata, eta 13:30etan banatuko dituzte sariak.