Egutegiko egun bat gehiago besterik izan ez dadin, biharko Emakumeenganako Indarke-riaren Kontrako Egunaren harira, hainbat ekitaldi antolatu dira.
Gaur, batetik, Beldur Barik lehiaketako bideoak ikusteko aukera izango da, eta ondoren sari-banaketa egingo da. Bestalde, Gaztelekuan, mural feminista osatuko dute.
Bederatzi bideo, lehiaketan
Gaur 19:00etan (karteletan gaizki dago), Biterin, banatuko dira Beldur Barik film laburren lehiaketako sariak. Bederatzi bideo aurkeztu dira Hernanin, indarkeria sexistari nola aurre egin erakusten dutenak, eta guztiak ikusi ahal izango dira. Hernanin, kategoria bakoitzean 150 euroko sari bana banatuko da, Berdintasun Kontseiluaren eta Udal Berdintasun Arloaren eskutik.
Baina bideo hauek Beldur Barik lehiaketa orokorrean ere ari dira parte hartzen, eta azaroaren 27ra arte ikus-entzuleek gustokoenaren aldeko botoa eman dezakete webgunean: www.beldurbarik.org. Sari hauek abenduaren 2an banatuko dira Eibarren, eta egun horretan topaketa ere egingo da. Horrela, bertara joateko autobusean izena emateko aukera ere badago, webgunean.
Manifestazioa eta Tribial Feminista, A25ean
Bestalde, larunbata kalera ateratzeko eguna dela adierazi du Hernaniko Koordinadora Feministak, eta horrenbestez, Emakumeenganako Indarkeriaren Aurkako Nazioarteko Egunaren harira manifestazioa antolatu du. Hitzordua eguerdiko 13:00etan Plaza Berrin izango da.
Arratsalderako, berriz, Tribial Feminista antolatu da, 19:30etan Garinetik abiatuta, kalean zehar. Ondoren, Festa Feminista ospatuko da Garinen. Pintxoak dastatzeko aukera ere izango da.
Gaztelekuan ere, bat eginda
A25arekin bat egin duen beste talde bat Gaztelekua izan da. Aste osoan zehar hainbat ekintza egin dituzte, eta gaur mural feminista prestatuko dute. Biharko manifestaziora joateko deia ere luzatu dute, eta arratsaldean txapa feminista tailerra egingo dute.