Sagardoaren Lurraldeak antolatuta, II. Sagardo Foruma egingo da Hernaniko Orona Ideo egoitzan (Galarretan), gaurtik larunbatera bitartean. «Sagarra, sagarraren eratorriei eta sagardoaren kultura eta turismoari buruzko jardunaldi teknikoak» izango dira.
Mundu osoko hizlari eta entzuleak
Hiru eguneko egitaraua gaur hasiko da; 08:45etatik 09:15etara akreditazioak banatuko zaizkie izena eman dutenei, eta ongietorriaren ondoren, 09:30etan hasiko da aurreneko hitzaldia: Sagarlaneko Aitor Etxeandia ariko da hizketan, Euskal Herrian sagarrondoek duten egoeraren inguruan.
Horrela, gaur eta bihar, 09:30etatik 14:00ak arte hitzaldi eta mahai-inguruak izango dira. 11 herrialdetako hizlari eta entzuleak izango dira, jakintzak eta esperientziak konpartitzeko.
Dantza eta dastaketa
Bestalde, larunbatean I. Nazioarteko Sagardo Lehiaketa egingo da. Epaileek lana bukatuta, herritarrek izango dute aukera 13:00ean, sagardoa dastatu eta Tio Teronen Semeak dantza taldearen emanaldia ikusteko.