Duela urtebete Plenoak erabaki zuen «haurreskola Urumea Berriko lokalean kokatzea gehiengo osoz», eta hori aprobetxatuz, prentsaurrekoa egin zuen Astigarragako EH Bilduk herenegun.
Mozio bidez onartu zuten hori, EH Bildu eta PSE-EEren aldeko botoarekin, eta EAJren kontrakoarekin: «ordutik, haurreskolak garesti ordaindu du EAJren aurkako botoa. EAJk, Osoko Bilkuraren, herritarrek ordezkaritza politikoaren organo gorenaren, erabakia gauza ez dadin aritu da. Urtebete pasa da eta pausorik eman gabe 365 egun galdu ditugu», salatu zuten.
Beste proposamenen bila
Horren aurrean diote, EAJren asmoa zela Haurreskola egungo Kultur Etxean kokatzea, baina aurkariak zituela ikusita, «beste proposamen batzuk bilatzen aritu» dela. Besteak beste, proposatu zuen, aurrena, «Urumea Berrin 450m2ko lokal bat eta udalarena ez den 500m2ko lokal bat AGUIko eremuan»; eta azkena izan da, «Arrobitxuloko harrobipean eta Arrobitxulo bidea 7 eta 9 etxeen atzealdean dagoen aparkalekua kenduta eraikin bat egitea». EH Bilduko kideen ustez, «leku umela, itzalean eta garestia». Hau da, «proposamen berri bakoitza, are eta aldrebesagoa».
Izan ere, beren ustez, «Urumea Berriko 800 m2-ko lokalak baldintza guztiak betetzen ditu herri honek haurreskola duina izateko», eta «EAJren obsesio bakarra EH Bilduk proposatutako guztiari ezetz esatea da eta proposamen hau ere atzera bota nahi dute, besterik gabe EH Bilduk proposatutakoa delako. Oso larria da EAJren obsesio pertsonal eta partidistengatik, herriaren etorkizuna oztopatzea».
Gainera, lokal hori bat datorrela Partzuergoak gomendatutakoarekin: «Haurreskolak Partzuergoak argi esan du 7 geletako haurreskola batek pasiloak kontuan hartu gabe, gutxienez 588m2ko lokala eta 130m2ko jolastoki irekia beharko lukeela».
Herritarrei, deia
Bukatzeko, herritarrei deia egin diete, «eskaera honekin bat egin dezaten, denen inplikazioarekin lortuko baita behingoz haurreskola duina eta berria martxan jartzea».