Finalerako pasea ematen duten zazpi postuetan bukatu du aurreneko itzulia Agin Laburuk, Bertsolari Txapelketa Nagusiaren finalaurrekoetan. Lehian bete-betean sartuta dago astigartarra, bizi-bizirik, abenduaren 17an Barakaldoko BECen kantatzeko.
Zazpigarren dago oraingoz, 690 punturekin. Hurrengoak, Miren Amurizak, 678,5 puntu dauzka, eta segidan datoz beste hainbat, gertu: Jon Maiak 675 ditu, Jon Martinek eta Oihana Iguaranek 671, Jone Uriak 669, Julio Sotok 668,5 puntu, Unai Agirrek 667,5...
Donibane Lohizunen, saio borobilaren bila
11,5 puntuko alde hori defenditu beharra dauka Laburuk, beraz, bigarren itzulian. Saio borobila errepikatu beharko du horretarako, eta horretara joango da Donibane-Lohizunera. Bertan izango du saio erabakigarria, azaroaren 26an; 17:00etan hasita, Jai-Alain.
Maila haundiko saioa espero da: Maialen Lujanbio, aurrena dagoena momentuz; Igor Elortza bosgarrena; Jone Uria, Julio Soto eta Iñaki Apalategi.
Saioa ikusteko sarrerak, dagoeneko salgai daude, interneten: www.bertsosarrerak.eus. 15 euro dira; gazteek 8 euro.