Ez ohiko Plenoa deitu zen asteazkenean, bereziki, Irisgarritasun Planari hasiera emateko. Izan ere, dirulaguntza eskatu du Jaurlaritzan Udalak, Irisgarritasun Planari dagokion aurreneko fasean zehazten den Arrobitxuloko igogailua eraikitzeko, eta horretarako, Plana Plenoak onartzea beharrezkoa da.
Puntu hori zen ez ohiko Plenoko gai bakarra, baina hori onartu aurretik, hiru mozio lantzea ere proposatu eta onartu zuten: Kataluniako independentzia adierazpenaren inguruko mozioa, Udalbiltzak landutakoa eta EH Bilduk Plenora ekarria; Kataluniako atxiloketen inguruko mozioa, Eusko Legebiltzarrean onartua eta Udaleko Bozeramaile Batzordean landu ondoren Plenora eramana; eta azkenik, Emakumeenganako Indarkeriaren Aurkako Nazioarteko Egunaren inguruko adierazpen instituzionala, Eudelek proposatua eta PSEren eskutik Udalean aurkeztua. Hirurak onartu ziren, erabateko adostasuna azkeneko kasuan bakarrik lortu bazen ere.
Kataluniarekin, zalantzak
Mozioetako aurrenekoa EH Bilduk aurkeztu zuen: Kataluniaren independentzia adierazpenaren ingurukoa. Andoni Gartzia bozeramailearen esanetan, «aldarrikapenak duen garrantzia ikusita, aitortza adieraztea» zen helburua. «Demokrazia da herritarren borondatea errespetatzea», gaineratu zuen.
PSE-EEko bozeramaileak, Mikel Duranek kontra bozkatuko zuela jakinarazi zuen; «bozketa ez zen arau juridikoen barruan egin, eta ez dugu adierazpena aitortzen».
EAJtik, berriz, Zorione Etxezarragak azaldu zuen «Kataluniako prozesuan ilusioa eta asmo onak» ikusi dituztela, baina abstenitu egingo zirela, «errepublika onartu ez delako». Gartziak «Astigarragako EAJ beti atzetik» dabilela erantzun zion, eta Etxezarragak bueltan, «Euskal Herriko independentziarako beste berme batzuk» defendatzen dituztela.
Gauzak horrela, EH Bilduren aldeko botoekin, EAJren abstentzioarekin eta PSE-EEren kontrakoarekin onartu zen adierazpena.
Atxiloketen inguruko mozioa, berriz, Legebiltzarrean EH Bilduk, EAJk eta Podemosek onartutakoa zen, baina Governeko kideen atxiloketen ondoren, puntu batzuk aldatuta aurkeztu zuten Plenoan, Bozeramaile Batzordean landu ondoren. EAJ eta EH Bilduren aldeko botoekin eta PSE-EEren kontrakoarekin onartu zen.
A25eko adierazpen instituzionala, berriz, aho batez onartu zen. (Mozio guztiak ikusgai: www.kronika.eus).
DBH batzordea eta Haurreskola, galderetan
Bukatzeko, galdera eta erreguen puntuan, Andoni Gartziak galdetu zuen noiz egingo zen DBH batzordea. Azaroan egingo dela erantzun zion alkateak. Haurreskolaren inguruan galdetzean, berriz, Jaurlaritzaren erantzunaren zain zeudela jakinarazi zuen, zein proiektu finantzatuko duen jakiteko.
Plenoa- A25eko egunari lotutako mozioa
Mugimendu feministak azaroaren 25erako deitutako mobilizazioekin, bat
Aho batez onartu zuten Emakumeenganako Indarkeriaren Aurkako Nazioarteko Egunari lotutako mozioa.
Asteazkeneko Plenoan aztertu eta bozkatutako mozioen artean, A25ari lotutakoa izan zen, hiru alderdietako kideek aho batez onartu zuten bakarra; Emakumeenganako Indarkeriarekiko Aurkako Nazioarteko Egunari lotutakoa, hain zuzen.
«Eudelek proposatu eta Astigarragako Udalera PSEren eskutik iritsitako adierazpen instituzionala» zela argitu zuen Zorione Etxezarraga alkateak, eta gaineratu zuen, EH Bilduk gehitutako puntu batzuekin osatu zutela.
10 puntuko deklarazio instituzionala
Guztira, 10 puntutako deklarazio instituzionala osatu eta onartu zuten hiru alderdietako kideek, aho batez, Plenoan.
Besteak beste, egin zuten emakume biktimekiko erreparazio eskubidearen aitortzaren alde; udaletan neurri estrukturalak hedatu eta jarraitzearen alde; gizartean aldaketa estrukturalak bultzatzearen alde; beharrezkoak diren baliabideak jartzearen alde, emakumeen aurkako indarkeria gizartetik desagerrarazteko; Emakumeen Munduko Martxak bultzatutako protokoloarekin bat egitearen alde; eta genero berdintasuna sustatzearen alde, bai udaleko aurrekontuak definitzean, edota hezkuntza arloan ere.
A25ari lotuta Harituz elkarteak antolatutako ekitaldiak gogorarazi zituzten Plenoan, eta herritarrak parte hartzera gonbidatu.
Herritarrei deia, ekimenetan parte hartzeko
Adierazpena onartzeaz gain, gogorarazi zuten azaroaren 23 eta 25ean hainbat ekitaldi antolatu dituela Harituzek, eta herritarrei parte hartzeko deia egin zieten. Era berean, «mugimendu feministak deitutako mobilizazioekin bat» egiten zutela gaineratu zuten.