Gabonen aurrean herria girotzeko asmoa dauka Berriak Elkarteak, eta horren bueltan, ekimen berria jarriko du martxan gaurtik. Hernanin, komertzio txikietan guztia eskura lelopean, Hernani Txartelarekin ordaintzen dutenak saritu nahi ditu merkatari eta ostalarien elkarteak.
Horrela bada, gaurtik abenduaren 13ra bitarte, hilabetez, opari izugarriak irabazteko aukera izango dute hernaniarrek.
Sariduna zaren ala ez, momentuan
Denera 3.000 euro banatuko dituzte saritan. Sari horiek zoriz banatuko dira; Hernani Txartelarekin erosketa bat egiten den bakoitzean, erosketen tiketean azalduko da bezeroa sariduna den ala ez. Ez dute jakingo, ordea, zein den egokitu zaien saria.
Izan ere, abenduaren 16an egingo den ekitaldian banatuko dituzte sari horiek; eguerdiko 13:30etan izango da, udaletxean. Ordura arte, ezinbestekoa izango da erosketetako tiketa gordetzea.
Sariak abenduaren 16an banatuko dira, udaletxean.
Hernanin erostea, helburu
Hernanin denetarik erosi daitekeela aldarrikatu nahi du Berriak elkarteak kanpaina berri honekin.