Laugarrenez Primerako Ogia kanpaina abiarazi du aste honetan Agipan Elkarteak. Denera 37 okindegik egin dute bat; tartean dira Hernani, Andoain, Aretxabaleta, Arrasate, Azpeitia, Beasain, Beraun (Errenteria), Deba, Donostia, Getaria, Hondarribia, Irun, Legazpi, Tolosa, Soraluze, Urretxu, Billabona eta Zumarragako saltokiak.
Horren arabera, hilaren 26ra arte bezeroek hainbat zozketatan parte hartzeko aukera izango dute, Primerako Ogia kartela kanpoaldean kokatuta daukaten okindegi txikietan.
Horietan guztietan, kutxak jarriko dituzte, eta bertan lau erosketa egiten dituztenean, aukera izango dute txarteltxoa kutxan sartu eta zozketan parte hartzeko.
Sari garrantzitsuak izango dira aurtengoan, izan ere, aurreko edizioetakoak hobetzen saiatu dira: «12 egonaldi Euskadiko landetxetan (bi gau bi pertsonarentzat, gosaria barne), Nekaturren lankidetzari esker. Horrez gain, establezimendu bakoitzak txigorgailua eta lau ogi-sorta zozketatuko ditu», azaldu dute.
Kalitatezko eta tokiko ogiaren alde
Laugarren aldiz antolatu du Agipan Elkarteak «kalitatezko ogiaren eta tokiko ekoizpenaren aldeko kanpaina» hain zuzen, «merkataritza-establezimendu txikietan kontsumoa sustatzeko». Izan ere, «fabrikatzaile handien ogi-ekoizpen masiboan gero eta lehiakortasun handiagoa» dago.