Haundia egin du Aitor Gorrotxategi pelotari hernaniarrak: Munduko Kopa irabazi zuen Angleten, aurreko asteburuan. Afizionatu mailako nazioarteko bigarren txapelketa garrantzitsuena, hain justu.
Estatuko selekzioarekin aritu da Gorrotxategi, eta lau partidu jokatu ditu. Baita guztiak irabazi ere, bi bikote ezberdinekin. Sailkapen fasean, bi partidu jokatu zituen. Azpiri bizkaitarrarekin jokatu zuen aurrenekoa, Boliviaren kontra: 10-2 eta 10-2 nagusitu ziren. Bigarrena, berriz, Yoldi nafarrarekin irabazi zion Txileri (10-1 eta 10-3).
Azkeneko fasean, berriz, Mexikori irabazi zion semifinala, Azpirirekin, aurrekoak baino larriago: 10-5 eta 10-9. Eta Frantzia izango zuten aurrean, finalean. Yoldirekin jokatu zuen partidu erabakigarria, profesional izandako bi pelotariren kontra: Xala eta Harizmendy. Maila haundiko partidua jokatu zuten denek, eta txapela ekartzea lortu zuen Gorrotxategik (10-6 eta 10-7).
Arizmendi txapeldun, 22 urtez azpikoetan
Ez zuen makalagoa egin Endika Arizmendik. 22 urtez azpikoetan irabazi zuen nazioarteko txapelketa, trinketean.
Hiru partidu jokatu zituen berak, bi bikote ezberdinekin; hiruak erraz, esperientzia gutxiko pelotarien kontra.
Aurrena, Cuevas gipuzkoarrarekin irabazi zion Txileri (40-4). Gero, Arana bizkaitarrarekin nagusitu zen Venezuelaren kontra (40-5).
Eta azkenik, finalean, Aranarekin aritu zen berriro, Boliviaren kontra, eta 40-10 nagusitu ziren, txapela janzteko.