Herenegun egin zuten agerraldia Hernaniko zenbait eragile sozialek abenduaren 9rako Bakearen Artisauek egindako deialdiaren berri eman eta mobilizazioetan parte hartzea sustatzeko. Sandiusterrin egin zuten, eta bertan irakurri zuten aldarriaren arabera, «bistan da bakea ez dela iritsi oraindik Euskal Herrira».
Pausuak ematen, baina ez nahikoak
Dena den, diotenez, «biktimen sufrimenduaren errekonozimenduan ari da euskal gizartea pausoak ematen (azpimarratu behar da hala ere, eremu honetan, biktima guztiak sartu behar direla, ez alde batekoak bakarrik, batzuk nahi duten bezala). Bestalde, denon arteko elkarbizitza lortzeko ibilbidean ere, hasiak gara lehen urratsak ematen».
Beren ustez, «Euskal presoen egoeran ordea, nahiz eta jada, urte batzuk joan diren, ez da, zoritxarrez, aldaketarik egon, ez da mugimendurik izan». Hori dela eta, Bakegileen (Bakearen Artisauak, Bagoaz eta Sare) ekimen berriarekin bat egitea eskatu zuten: Orain Presoak!
Garin eta Zinkoenea tabernetan eman daiteke izena Parisera joateko.
Parisera joateko eskaera
Horren bueltan, beraz, abenduaren 9an Parisen egingo den manifestaziora joateko deia luzatu zuten. Dagoeneko tren bat bete dute, eta garraio gehiago antolatzekotan dabiltza, horretarako izena eman daiteke Garin eta Zinkoenea tabernetan.