Kalera aterako dira bihar eta postua jarriko dute Kaleratzeak Stop taldeko kideak, hala, kanpaina berri bat abian jartzeko. Hala azaldu diote Carlos Perez Vazquez eta Pedro Herrero Alvarez taldekideek: «jendeari Bankuen Jardunbide Egokiaren Kodearen edo De Guindos Dekretuaren berri eman nahi diogu».
Horren arabera, «hipoteka ordaintzeko arazoak dituztenek, bankuari bost urteko karentzia bat eskatzeko eskubidea dute, hileroko 30 eta 60 euro tarteko kuota murriztu bat onartuz». 2012ko martxoaren 6an onartu zen dekretua, eta dagoeneko ia banku gehienek bat egin dute Kodearekin: «arazoa da Bankuak ez diola aukera hori eskaintzen bere bezeroari».
Eta aukera hori da, hain zuzen, Hernaniko Kaleratzeak Stop taldeak, Euskal Herriko talde guztiek egingo duten bezala, herritarrari aurkeztu nahi diona: «laguntza eskaini nahi dugu, alde batetik, baldintzak betetzen dituzten ikusteko, eta bestetik, behar baldin badute, Bankura laguntzen diegu eskaera egitera».
Denera, hiru kasutan lagundu dute Hernaniko Kaleratzeak Stop taldeko kideek. «Uste duguna baino jende gehiagok jasaten du arazo hau [hipoteka ordaintzekoa], Euskadi mailan gainera, lotsagatik edo, jendeak babesa bilatzen du familiarengan», uste dute Perez eta Herrerok.
Hori dela eta, ezinbestekoa iruditzen zaie Jardunbide Egokiaren Kodea jakinaraztea.
Notaritza gastuak, erreklamatzeko bidea irekita
Ez da, ordea, Kaleratzeak Stop taldeak mahai gainean daukan gai bakarra. Izan ere, egun pil pilean dagoen gai bat dute: «Legearen arabera, notaritzako gastuen zati bat Bankuak ordaindu beharko luke, baina moldatu egin dira bezeroak ordaindu dezan. Hori horrela, jendea hasi da erreklamatzen, eta dagoeneko badaude bezeroaren aldeko sententziak», iragarri dute.
Gainera, nahiz eta hipoteka ordaindua izan, badago erreklamazioa egiteko aukera. Hori bai, betiere, duela 5 urte baino gutxiago bukatu bazenuen. Horren inguruan ere, laguntzeko prestutasuna azaldu dute Carlos Perez eta Pedro Herrerok, «horretarako taldeak badauka abokatu bat, gaiak bideratzen laguntzen diguna».
Zoru klausularen gaia, mantso
Badago beste gai bat urte hasieratik aurrera pixkanaka mugitzen hasi dena; hori da, hain zuzen, zoru klausulen erreklamazioena. Kaleratzeak Stop taldeak adierazi duenez, salaketa kopurua hain haundia izan da, epaitegiak mantsotu dituela: «lau hilabetetan geldirik egon dira epaitegiak, eta ondorioz, lan hori bakarrik egingo duten epaileak jarri dituzte».
Dena den, gaia martxan dagoela diote eta ematen ari diren sententziak aldekoak izaten ari direla nabarmendu dute. Beren datuen arabera, «Hernanin dagoeneko 100 salaketa inguru daude jarrita».
Mikrokredituerako, diru gehiago
Herri mailan, ordea, mikrokredituen gaiari heldu diote Carlos Perez eta Pedro Herrero herritarrek. Kaleratzeak Stop taldetik egin zuten proposamena Hernani Erabaki prozesu partehartzailearen bidez, eta aurten jarri dute martxan: «arrakastatsua izan da, baina jada ez dago dirurik».
Eta horregatik, «poztu gara ikusi dugunean herritarren batek 2018ko Hernani Erabakin beste 40.000 euro gehitzea proposatu duenean». Hala ere, beraiek aurrekontuen bidetik jo nahi dute: «2018ko aurrekontuetan mikrokredituetarako poltsa haunditzeko lanean ari gara orain», azaldu dute Perez eta Herrerok.
Taldea, irekita
Beren laguntza eskaintzeaz gain, herritarren laguntza ere eskertuko luketela diote. Horregatik, interesa dutenak animatu nahi dituzte Kaleratzeak Stop taldearen bileretara; ostegunero biltzen dira, 19:00etan, Transpakarren.