Hainbat aldaketa jasango ditu herri barruko autobus zerbitzuak, Udalak prentsa-ohar bidez jakinarazi duenaren arabera: «Hernaniko hiri barruko autobusaren goizeko zerbitzuan, autobus batzuk oso beteta joaten direla ikusita, egokitzapen txiki batzuk egingo ditu Udalak».
«Zerbitzua hobetzeko asmotan»
Bi izango dira, hain zuzen, egokitzapen horiek, Udalak jakinarazi duenaren arabera. Aurrenekoa, Zikuñagatik ateratzen den autobusean: «08:10etan ateratzen dena 08:25ean aterako da urtea amaitu arte, 15 minutu beranduago». Ohiko ibilbidea egingo duela azaldu dute, egungo geldialdi berberekin.
Bigarrena, Elkanotik (edo Biteri kultur etxearen ondotik) ateratzen den linean izango da: «Elkanotik 8:30ean hasten den ibilbidea 8:35ean hasiko litzateke, 5 minutu beranduago». Horrek, ordea, aldaketa txiki bat izango du ibilbidean: «ez da Txantxillara joango. Elkanon hasiko da eta, ohiko ibilbidea egin ondoren, Antziola kaletik zuzenean Zinkoeneara joango da eta hemendik Portura eta, gero, Elkanora bueltatuko da».
Aldaketa hauek «zerbitzua hobetzeko asmotan» hartu ditu Udalak, baina printzipioz behin behinekoak izango dira: «Urte bukaeran emaitzak aztertuko dira eta behin betiko erabakia hartuko da».