«Albiste ona jaso dugu epaitegietatik», hasi zuen herenegungo agerraldia Luis Intxauspe alkateak. Hain zuzen, azken egunotan jakin dute: «Espainiako Auzitegi Gorenak aintzat hartu du Hernani, Pasaia, Lezo, Astigarraga eta Usurbilgo udalok San Marko Mankomunitateko 2014ko aurrekontuen aurka egindako helegitea, eta, ondorioz, baliogabetu egin ditu orduko aurrekontuak».
Eta hala jakinarazi zuten prentsaurrean Hernaniko, Usurbilgo eta Oiartzungo udalek: «2014an, Hernanin, Astigarragan, Pasaian, Oiartzunen, Lezon eta Usurbilen hondakinen bilketa selektiboaren sistema ezarrita zeukaten. Horren ondorioz, udalerriek bere gain hartua zuten hondakinen bilketa. San Markos Mankomunitatearen bilketa zerbitzua, beraz, ez zuten erabiltzen udalerri horiek, eta, hala ere, Mankomunitateak urtero-urtero kobratzen zien zerbitzu horrengatik». Hori ikusita, helegitea jartzea erabaki zuten Udalek, tartean, Hernanikoak.
Izan ere, «irizpide horiek erabilita, atez ateko sistema geneukan udalok, gure hondakinak biltzeak eragiten zituen gastuez gain, beste udalen (garai hartan Donostia, Urnieta, Errenteria eta Lasarte-Oria) bilketa gastuak ere gure gain hartzera behartu gintuzten, gure tarifa nabarmen zamatuz, kaltetuz», azaldu zuten udaletako ordezkariek.
Epaia, hiru urteren ondoren
Hiru urteren ondoren jaso dute epaia: «gure herria eta herritarren mesedetan, orduko udal agintariek aurrekontu horiek errekurritzea erabaki zuten, eta erabakia hiru urte geroago etorri bada ere, pozteko modukoa da», adierazi zuten herenegun. Epai horren arabera, beraz, «ez da legezkoa jasotzen ez den zerbitzu batengatik kobratzea», azaldu zuten.
«Ikusi beharko dugu epaia nola exekutatzen den»
Baina hemendik aurrera, eta kontuan izanda 2015, 2016 eta 2017ko aurrekontuak ere errekurritu egin zituztela, Udalek diote: «ikusi beharko dugu epaia nola exekutatzen den».
Dena den, akordiorako bidea luzatu dute: «edozein kasutan, aurrera begira jarri nahi dugu, eta publikoki adierazi nahi dugu gure prestutasuna 2018ko aurrekontuei begira adostasunak lortzeko. Tarifak kalkulatzeko irizpideak berraztertzeko exijitzen diegu». Horretarako, dagoeneko eskatu dute Mankomunitatearen zuzendaritzarekin bilera.