Kameren instalakuntza berria salatzeko, elkarretaratzea

Kontzentrazioa egin zuten atzo Zikuñagako Papelerako lan­gileek zuzendaritzaren az­ke­­neko erabakiak «plantilan so­rrarazi duen ezinegona» adie­razteko. Enpresa Batzor­de­ak jakinarazi duenez, «ma­kina berri baten instalakuntza aprobetxatu dute, aurretik al­mazenean eta produktu arris­kutsuen deskargarako gunean zeuden kamerei, gehiago gehi­tzeko».
Eta erabaki hori ez dute begi onez hartu langile askok: «za­lantza asko ditugu kamara ho­rietako batzuekin, segurta­su­naz aparte, lan­gileen kon­tro­lerako erabiliko direla­koan».
Gaiaren inguruan zalan­tzak argitzen saiatzeko eta akor­dio batera iristeko, «bi­lera bat eskatu genion Zuzen­daritzari duela astebete, eta horren zai gaude». Dena den, ez daude oso itxaropentsu, eta ez dute uste bilera produktiboa izango denik.
Batez ere ikusita nola gauzatu diren azken asteotako ekintzak: «berandu informatu gaituzte erabaki honi buruz, kamerak martxan daude duela astebete», azaldu dute Ziku­ñagako Papelerako langileek.
Oraingoz, diote, ez dute mugimendu gehiagorik aurre­ikusi: «ikusi egin beharko da; akordiorik lortzen ez badugu, agian grebara joan beharko dugu, baina hori azkeneko era­bakia izango litzateke».