Prentsaurrekoa eskaini zuten herenegun Buruntzaldeako EH Bilduko hautetsi eta hautetsi ohiek, Lasarte-Orian: «ozen salatu nahi dugu egungo Gipuzkoako Hondakinen Kontsorzioak hartu duen erabakia; alegia, GHKko lehendakari ohi Ainhoa Intxaurrandieta eta GHKko kide ohi eta Ingurumen Diputatu Iñaki Errazkinen kontra bide judizialetik jotzeko erabakia».
«Mendeku gosean baino ezin dugu kokatu»
Bertan azaldu zutenaren arabera, «EAJ eta PSEko ordezkariek bide judizialari ekiteko hartzen duten erabaki hau, mendeku gosean baino ezin dugu kokatu». Gogorarazi zuten, gainera, 2011n hauteskundeak irabazi zituela EH Bilduk, eta beren programan, «argi adierazi zuen errauskailuaren proiektuak ingurumenean eta gure ekonomian zuen kostua onartezina zela eta, horren ordez, hondakinen kudeaketarako alternatiba bat eskaintzeko asmoa zuela».
Hauteskundeen aurretik, ordea, azaldu zuten, «2011ko maiatzean, hain justu, GHK ordezkari berriek kargua hartu baino astebete lehenago, EAJ eta PSE alderdiek Errauskailuaren proiektua FCC enpresari esleitu zioten, presaz eta modu ilunean. Finantza erakunde eta eraikuntza enpresa haundien mesedetan harturiko erabakia izan zen hura».
Horrela, EH Bildu boterean zela, 2013an erabaki bat hartu zuten: «Errauste Planta egiteko kontratua bertan behera gelditu zen, kontratistak eta GHKk lorturiko akordio bati esker».
Testuinguru horretan salatu dituzte Intxaurrandieta eta Errazkin.
Bertan behera uzteko, eskaera
Horren aurrean, Buruntzaldeako EH Bilduk zera eskatu du: «EAJko eta PSEko egungo agintariei amore eman diezaiotela mendekuaren bideari. Bere momentuan hartutako erabakiak oso ausartak eta koherenteak izan ziren hauteskunde kanpainan adierazitakoa kontuan hartuz».
Aprobetxatu zuten, baita ere, «apaltasun osoz jokatu zuten Ainhoa Intxaurrandieta eta Iñaki Errazkini gure elkartasuna eta babes osoa» adierazteko.