Txotx garaiaren argi-ilunak azaleratu, eta zer eta nola aldatu adostu nahi du Hernaniko EH Bilduk, herritarrekin. Horretarako, prozesu herritarra jarri du martxan, eta etzi izango da aurreneko saioa, asteazkenarekin: arratsaldeko 19:00etan, Biteri kultur etxean.
Bertan azalduko dituzte prozesuaren nondik norakoak; eta aurreneko ikuspegi bat jasotzeko, Nora doaz San Ferminak? prozesuaren berri emango du Patri Perales Iruñako zinegotziak. Mahai ingurua ere egingo dute ondoren, Iruñako jaien arazoei aurre egiteko hartzen ari diren neurriak ezagutzeko.
Bestalde, inkesta bat ere zabaldu du EH Bilduk, herritarren iritzia jasotzeko, bere sare sozialen bitartez.