Beste finalaurreko bat, Hernaniko bertso eskolako beste kide bat, eta emaitza borobila berriro. Nagusi izan zen Beñat Gaztelumendi, larunbatean, Maule-Lextarren. Añorgarrak 694,5 puntu jaso zituen, eta aurrea hartu zien Julio Sotori (668,5 puntu) eta Nerea Ibartzabali (663). Saioa irabazita, bigarren itzulira pasa da Gaztelumendi, eta Amurrion ariko da orain, azaroaren 19an.
Mauleko puntuazioak ez ziren, hala ere, aurreko saioetan bezain altuak izan. Horregatik, finalera sailkatzeko lehian bete-betean sartuta jarraitzen dute, Hernaniko bertso eskolako kide guztiek. Saio bakarra falta denean, Maialen Lujanbio dago aurreneko postuan, bosgarren Gaztelumendi, eta seigarren Agin Laburu; eta Unai Agirrek, 10garren postuan egonda ere, gertu dauka zazpigarrena, soilik 3,5 puntura.
Aitor Mendiluze, datorren igandean Durangon
Saio bakarra falta da, aurreneko itzulia bukatzeko; eta bertso eskolako beste kide bat izango da bertan. Durangon ariko da Aitor Mendiluze andoaindarra, datorren igandean; arratsaldeko 17:00etan, Landakon.