Jaiegunetik bueltan, lau zita izango dira Biterin, gaur hasi eta larunbatera bitarte; guztiak ere, mota ezberdinetakoak.
Gida-liburu baten aurkezpena izango da aurrenekoa, gaur arratsaldean: Hernaniko eta inguruko narrasti eta anfibioak. Iñaki Sanz-Azkue eta Egoitz Alkorta egileek aurkeztuko dute, 18:00etan hasita.
Eta gaur bertan izango da bigarren zita ere, 19:30etan hasita: Handia filma jarriko dute, atzotik astelehenera arte ikusgai egongo dena; baina berezia da gaurko saioa, bukaeran solasaldia egingo baitute, Jon Garaño zuzendariarekin, eta Eneko Sagardoy eta Iñigo Aranburu aktoreekin.
Haur literaturaren ahozko baliabide tailerra, etzi
Larunbatean izango dira beste bi zitak. Batetik, Aho bete amets haur literaturaren ahozko baliabideen lantegia antolatu dute. Yolanda Arrietak eskainiko du, 0-6 urteko haurren guraso, irakasle edota zaintzaileei zuzenduta. 10:00etatik 13:00etara izango da, eta izena eman behar da aurrez: Udal Liburutegian, liburutegi@hernani.eus, 943 55 29 66, edota whatsappez 688 635 462.
'Aho bete amets' tailerra eskainiko dute larunbatean, eta izena eman behar da aurrez, Udal Liburutegian, emailez edo telefonoz.
Bularretik Mintzora egitasmoaren barruan antolatukoa da saioa. Galtzagorri elkartearen eskutik, haur poesia eta album ilustratuak, ahozko jardunera nola ekarri landuko dute, partaideen artean emozio, estetika eta zentzuen bidezko giroa bultzatuz. Lantegi honek emango dio hasiera, egitasmoaren hirugarren ikasturteari; eta urtarriletik aurrera, berriro jarriko dute martxan irakurketa kluba, Udal Liburutegian. Gogorarazi dute, gainera, liburuen maletak maileguan hartu daitezkeela, urte osoan zehar.
Kulturaren inguruan, bi hausnarketa saio azaroan
Eta larunbateko bigarren zita, kulturaren inguruko hausnarketari hasiera emango diona da. Prozesuaren aurkezpena egingo dute, 10:00etan Biterin. Eta bigarren saio bat ere egingo dute azaroan: hilaren 25ean, goizeko 10:00etan.