Urtebete pasa da Udalak mikrokredituerako poltsa bat sortu zuenetik, eta dagoeneko jaso dituzten 35 eskaeretatik, 18k aurrera egin dute. Hala jakinarazi du Udalak: «maileguen %60 emakumeei eman zaizkie. Guztira, 47.950 euroko maileguak eman dira ekimen honen baitan. Eskatzaileek lana aurkitzeko edo zituzten lan-baldintzak hobetzeko ekimenak izan dira, kasu askotan, mikrokredituak eskatzeko arrazoiak», azaldu dute prentsa-ohar bitartez.
Herritarren proposamena
2015eko Hernani Erabaki parte-hartze prozesuan proposatu zuten mikrokredituen ekimena, eta 2016ko irailean jarri zuen martxan Udalak: «30.000 euroko funts batekin abiatu zen ekimena, eta aurtengo ekainean 15.000 euro gehitu zitzaizkion poltsari», jakinarazi dute.
Eskaerak, Batzorde baten esku
Denera 35 proposamen izan dira, eta horiek aztertu eta onartu ala ez erabakitzeko, Batzorde bat eratu zuten, Udaleko Zerbitzu Sozialek, Fiare Elkarteak, Kaleratzeak Stopek eta Amher elkarteak osatuta.
Izan ere, mikrokredituak jaso ahal izateko, hainbat baldintza betetzea ezinbestekoa da. Eta helburua da «unean uneko larrialdi ekonomiko baten aurrean laguntza bat ematea herritarrak egoera zail horretatik irten ahal izateko». Azken finean, «funts honetako mikrokreditu bat jasotzeak berau itzultzeko konpromisoa suposatzen du, pertsona gehiagok erabiltzeko aukera izan dezaten».