Gaur bilduko da Hernaniko Udaleko plenoa, ohiko deialdian, hilabeteko azkeneko asteartean. Arratsaldeko 19:00etan izango da, udaletxeko pleno aretoan, eta 15 puntuko gai ordena daukate lantzeko.
Horietako bost, mozioak izango dira, udal taldeek aurkeztutakoak: EH Bilduk bat, eta bina Orain Hernanik eta EAJk.
EH Bilduk eta EAJk, mozio bana aurkeztuko dute autobus zerbitzu publikoari buruz; eta EAJk beste bat, Jordi Cuixat eta Jordi Sanchezen kartzelaratzeari buruz. Orain Hernanik, berriz, beste bi gai ikutuko ditu: herritarren eskubideak gauzatzeko giltza gisa erroldarako sarbidea izateko bermeari buruzko mozioa; eta gobernu taldearen gardentasuna eta informazioa hobetzeari buruzkoa.
Taxien tarifak, eztabaidagai
Mozioen aurretik, abuztuko eta iraileko dekretuen, eta kontuhartzailearen oharren berri emango dute, eta transferentzia bidezko kreditu aldaketa bat ere landuko dute. Ondoren, 2018ko taxien tarifak ere eztabaidatuko dituzte, eta baita gertakizun profesionalen estaldura Gizarte Segurantzarekin kontratatzea ere.
Azkenik, proposatuko dute udal taldeko kideek konpromisoa hartzea, errespetatzeko informazioaren segurtasunaren inguruko arauak, eta datu pertsonalen eta intimitatearen babeserako eskubidea.