«Erreferentzialtasun femeninoen falta» nabaritu, eta horri aurre egiteko hainbat ekimen martxan jartzea erabaki du Hernaniko emakume talde batek. «Fabriketan emakumeek egin zuten aurreneko grebaren, edo Enpar Pineda bezalako hernaniar erreferente baten berri ez daukagu ia».
Aurreneko hil honen hasieran elkartu ziren, Emakume hartu hitza eta ekintza. Plazara goazen! lelopean, eta martxora arte, hainbat ekimen egiteko prozesuari eman diote hasiera.
Bego Uharte, Lurdes Mendinueta eta Aminata Diop, mahainguruan
«Gure presentzia eta lana agerian eta balio publikoan egon ez bada ere, eta historiatik baztertu nahi izan gaituzten arren, espazio askotan hartu dugu parte; baita egokitu ez zaizkigunetan ere. Gaurdanik orain arteko emakumeon lan eta ekimen ixildua argitara aterako dugu», azaldu zuten aurreneko bileran.
Hemendik aurrera egingo diren ekimenen berri pixkanaka emango dute, eta parte hartzera dei egin dituzte emakumeak. Hurrengo zita, azaroaren 30ean izango da, Biterin 19:00etan; Bego Uharte, Lurdes Mendinueta eta Aminata Diopekin mahaingurua egingo da: Konpromisoa emakumeon begiradatik. Martxora arte, berriz, landuko dira emakumeek historian zehar jasandako tortura, memoriaren transmisioan, ixilpeko erreferenteak edo emakumeon lanari aitortza publikoa.