«Presoen gaia desblokeatzea da kontua», azaldu dute Hernaniko Sareko kide diren Bego Arrondok, Aitziber Larramendik eta Itziar Mujikak. Horixe lortzeko helburua dauka Bakearen Artisauak abenduaren 9rako antolatzen ari diren Parisko manifestazioak, eta bat egin dute Bagoazek, Foro Sozialak, Etxeratek eta Sarek. Euskal Herrian bakearen alde, orain presoak! lelopean, «euskal presoei aplikatzen zaien salbuespen legedia deuseztatzea» eskatuko da.
Bertara joateko 1.000 lagun eramango dituen trena bete da dagoeneko, baina izena emateko zerrendek irekita jarraitzen dute. Hernanin, Garin eta Zinkoenea tabernetan, Peña okindegian eta Lurreko dendan jarritako zerrendetan eman daiteke izena, eta Ereñotzun, Irrintzi tabernan. «Beste tren bat lortzeko saiakera egiten ari da, eta baita autobusak ere. Adinekoek eta umeekin joango direnek lehentasuna izango dute trenean joateko. Horregatik, inportantea da zerrendetan izena ematea, antolatu ahal izateko». Autobuserako txartelak 65 euro balio ditu, baina langabetu eta gazteentzako laguntzak ematea aurreikusten dute.
«Denon arteko elkarbizitzarako, egoera aldatu beharra dago»
Azken urteetako egoera politikoaren baitan, «Espainiako Gobernuak beste jarrera bat izatea espero» zutela diote, baina gauzak ez direla aldatu, eta horregatik, eskaerek betikoak izaten jarraitzen dutela: «Presoei graduz aldatzeko aukera ematea, zigorraren 3/4ak beteak dauzkatenak ateratzea, baldintzapeko askatasunak ematea, gaixo larriak askatzea, adineko presoak askatzea, frantziar zein espainiar estatuan egindako espetxe zigorrak batzea... Azken batean, salbuespen legedia deuseztatzea eskatzen dugu».
Hernaniren kasuan, 20 dira preso dauden herritarrak, eta horietatik 19 daude lehenengo graduan; bakarra, hirugarrenean. Horien artean, bereziki kezkatzen dituzte Gari Arruarte eta Baldoren kasuek. «Lan-talde berezi bat arduratzen da kasu hauetaz. Gari Arruarte preso gaixo larrietako bat da, eta Baldok, berriz, kondenen batuketaren erruz barruan badago ere, aspaldi behar zuen kalean». Era berean, Ibon Fernandez Iradi ere kontuan hartzen dute, baina Lasarteko taldea arduratzen da gehiago bere kasuaz.
«Badirudi Frantziako Justizia Ministerioarekin hitz egiteko bidea irekitzen ari dela. Eta Frantzia mugitzen bada, agian Espainia mugituko da»
«Alderdi politikoetatik egiten diren ahaleginak nahiko antzuak dira. Horregatik, Bakearen Artisauen dinamika, herritarrak aktibatzea, ezinbestekoa da. Luhuson abenduan (Bakearen Artisauak atxilotzean izandako erantzuna) eta Baionan apirilaren 8an (ETAren armagabetze egunean) ikusitakoaren ondoren, badirudi Frantziako Justizia Ministerioarekin hitz egiteko bidea irekitzen ari dela. Eta Frantzia mugitzen bada, agian Espainia mugituko da. Gizartearen aktibazioak bultzarazi dezake gobernua, gaiari heldu eta mugitzera».
Bide horretan ari da lanean, Hernaniko Sare ere. «Gu astero elkartzen gara. Talde txikia gara, baina gero beti dago jendea laguntzeko, beste sare txiki batzuk sortzeko. Gure filosofia saretzea da, eta ahalik eta aniztasun haundiena bilatzea: Osakidetzarekin, Hezkuntzarekin... arlo askorekin lan egitea». Zentzu horretan, adibidez, garrantzitsutzat jo dute uztaileko Plenoan onartutako mozioa. «Gaixo dauden presoen inguruko mozioa onartu zen, aldaketa bat edo beste eginda, alderdi guztien oniritziarekin. Eta ez da hori bakarrik; preso gaixo larrien herrietako 11 Udalek konpromisoa hartu zuten Espetxeetako Zuzendaritza Nagusiarekin harremanetan jarri eta kasuei jarraipena egiteko».
Beraz, horretan segiko dutela argi daukate. «Asko erreta daude, etsita. Baina pausuak eman dira eta jarraitu behar da horretan, berandu baino lehen. Sinisten dugu denekin egin behar dugula lan. Denon elkarbizitzarako, egoera aldatu beharra dago».
Agerraldia, azaroaren 9an
2017a «erabakiorra» izango zela argi izan du Sarek, eta zentzu horretan, urte honetan zehar lanean aritu dira: «politikariekin salbuespen egoeraren inguruan sakondu, urtarrileko Bilboko manifestaziorako indarrak bildu, Nazioarteko harremanetan sakondu, Foro Sozialarekin elkarlanean aritu...».
Baina herritarrak aktibatzeko helburuari segika, herriz herri lanketa zehatzak ere egiten ditu Sarek. «Hernanin asmoa daukagu Hezkuntza arloarekin lan egiteko, kontuan har dezaten senideak kartzelan dituztenen umeen egoera psikologikoa, eskola orduak galdu beharrak daukan eragina... Horri helduko diogu orain».
Baina bitarte horretan, Pariseko manifestazioa, eta ondoren, urtarrilekoa, Bilbokoa, dituzte buruan. «Azaroaren 9an agerraldia egingo dugu Sandiusterrin, 19:00etan, abenduaren 9ko Pariseko manifestaziorako atxikimenduak biltzeko. Asmoa da herritarrak aktibatzea. Politikariak, sindikalistak... bai. Baina baita Hernaniko kirol edo kultur arloetako jendea ere, norbanakoak eta esparru desberdinetakoak».
Kartzeletan barrena itzulia, Parisen elkartzeko
Beste hainbat herritan ere egingo dira bestelako agerraldiak, eta Iparraldean ekintza gehiago ere prestatu dituzte. Horietako bat, Frantziako Estatuko kartzeletan barrena egingo den itzulia; azaroaren 16an hasita, Tolosa, Marseilla, Lyon, Poitiers, Nantes, Rennes eta Lilleko kartzeletan barrena egingo da, Parisekoetan bukatzeko, eta abenduaren 9an manifestazioarekin bat egiteko.
Gauzak horrela, «gizarte zibilaren aktibazioa» oso garrantzitsua dela azpimarratzen dute behin eta berriro Hernaniko Saretik, eta herritarrak animatu dituzte ekimenekin bat egitera. «Bonoak ere aterako dira; Parisera joan ezin duenak, nahi badu, bonoen bidez ere lagundu ahal izango du». Informazio gehiago zabalduko dute pixkanaka. «Paris Luhuso izan zena bihurtzea da helburua; 10.000 lagun bildu nahi ditugu. 5.000 badira ere, ondo. Baina 25.000 badira, hobeto!».
HERNANIKO SARE
- Asteartero biltzen da taldea, 18:00etan Biterin.
- Azaroan zehar, asteartetan bildu beharrean asteazkenero bilduko dira.
- Ateak zabalik izaten ditu beti Sarek, ahalik eta talde anitzena osatzeko asmoz, eta saretzen jarraitzea da asmoa; laguntzeko prest daudenekin beste sare txiki batzuk osatzekoa.