Martxa ederra hartu du Ereñotzun, aurreko astean hasi zen Udazken Kulturalak. Dagoeneko osatu ditu bost zita, eta seigarrena izango dute gaurkoa, auzotarrek.
Egun osoko plana prestatu dute, gainera. Legazpiko Mirandaola burdinolara egingo dute bisita goizean, eta Zerainen bazkalduko dute gero. Autobusez egingo dituzte joan-etorriak. Joan nahi dutenek, hori bai, aurrez zeukaten txartelak erosi beharra: autobusa, burdinolara sarrera eta bazkaria, helduek 30 euro, haurrek 15 euro, eta 2 urtetik beherakoek doan, baina txartela hartuta haiek ere.
Urumeako fauna eta florari buruz, erakusketa
Festa giroa izan zen nagusi Ereñotzun, aurreko asteburuan, urteroko bi zitarekin. Batetik, giro ederrean egin zuten Aranora igoera, bizikleta hartuta, Ereñotzuko semaforotik. Eta bestetik, auzoko festa ospatu zuten igandean, frontoian.
Ezagutza, esperientzia eta bizipenak izan dira, aldiz, aste honetako bi saioen ildoa: Eli Pagolak eta Eneka Gorrotxategik Hego Amerikan egindako bidaiaren irudi emanaldia (aurreko astean atzeratu zena); eta Hernaniko eta inguruetako anfibio eta narrastien gida-liburuaren aurkezpena, Egoitz Alkorta eta Iñaki Sanz-Azkueren eskutik.
Bigarren horren haritik joko du datorren osteguneko saioak ere: Urumeako fauna eta flora argazki erakusketa jarriko du Haritzalde Natur Taldeak, Auzo Udaleko aretoan, azaroaren 23ra arte; eta erakusketaren aurkezpena egingo dute ostegunean, azaroaren 2an, arratsaldeko 19:00etan hasita.