Pasa da aurreneko fasea, eta gaur emango zaio hasiera Euskal Herriko Bertsolari Txapelketa Nagusiko bigarrenari, alegia, finalaurrekoei. Eta aurreneko zita honetan, bertan izango da Agin Laburu astigartarra. Arabako Bastida herrian izango da, udal kiroldegian, arratsaldeko 17:00etatik aurrera.
Beste bost bertsolari
Baina Laburu ez da Bastidako oholtza gainera igoko den bertsolari bakarra, beste bost ere izango dira. Horietako batzuk, Laburu bera bezala, finalaurdenetatik pasa direnak: Jon Martin, Jone Uria eta Nahikari Gabilondo, hain zuzen. Igor Elortza eta Sustrai Colinak, ordea, zuzenean eskuratu dute finalaurrekoetarako txartela, duela bi urteko finalean aritu izanagatik.
Bost zati
Hain zuzen, bost proba egin behar izango dituzte bertsolariek: binaka, gaia emanda, hiruna bertso zortziko haundian; binaka, gaia emanda, hiruna bertso zortziko txikian; banaka, lehen puntua emanda, hiru bertso zortziko txikian; binaka, gaia emanda, hiruna bertso sei puntuko motzean; eta azkenik, kartzelako lana: banaka, gaia emanda, hiru bertso nahi den doinu eta neurrian.
Azaroaren 10ean, Zipotzan
Saiotik saiora ibiliko datozen egunetan Agin Laburu, izan ere, azaroaren 10ean, ostiralez, saio berezia izango dute berak eta Unai Agirre hernaniarrak Zipotza elkartean.
Bertso-afari moduan antolatu dute saioa; iluntzeko 20:30etan emango diote hasiera planari. Joan nahi duenarentzat, dagoeneko salgai daude txartelak, 20 euroan; afaria prezioaren barruan dago.