Kataluniaren subiranotasunaren aldeko ezekerreko alderdien batasunaren ondorio da AExRC, Asociación Acuerdo de Esquerra por la República Catalana. 2015ean sortu zen, «Errepublika Katalnuiarraren aldeko prozesu eratzailean eragiteko, lan egiteko», Francesc Matas, elkarteko lehendakariordearen hitzetan. Eta lanean segitzen dute: «Argi daukagu akordio batean ezkerrekoek baino askoz ere jende gehiago bildu behar dugula; baita eskubikoek ere».
Gure Esku Dagok antolatuta, gaur 18:30etan hitzaldia emango du Biterin: Errepublika Sozialaren aldeko Iraultza Kataluniarra. Azken orduko berriek izandako eraginari buruz, eta bereziki, atzo bertan gertatutakoari buruz ariko da, Puigdemontek Parlamentuaren esku utzi eta gero 155. artikulua ezartzearen ondorioen aurrean zer egin erabakitzea, iragarrita zegoen bezala.
«Diziplina haundia dago»
Matasek dio «fokoetatik kanpo» aritu izan direla lanean, errepublikaren aldeko ideiaren garapenean. «Asko lagundu dugu ideia horren garapenean. Politikoa izan da gure lana, bitartekariarena egitea. Behassrrezkoak ziren harremanak sortzen lagundu dugu. Errepublikaren ideiak independentziarenak baino jende gehiago ordezkatzen du, eta adostutako konponbideen aldekoek ere gustuko dute. Errepublika konfederatuaren aldeko ideia oso errotuta dago Katalunian».
Gauzak horrela, pozik agertu da kataluniar herriak erreferendumaren aurrean izandako jarrerarekin. «Herriaren indarra ikaragarria izan da. Diziplina haundia dago; iraultza kataluniarraren alde pazifistarena. Amorrua, haserrea, harridura ere bizi ditugu, baina ausardia haundia dago».
«Herriarengan konfiantza izan behar da, eta borrokatu»
Atzoko erabakien berri jakin aurretik, Matasek Kronikari aitortu dio «155. artikuluak alarma sortu» duela, eta «haserrea». Hala ere, gertatu daitekeenaren aurrean, irmoki defendatzen du «herriarengan konfiantza izan eta borrokatu» egin behar dela. «Bikaintasuna bi alderdi uztartzean datza: askatasun demokratikoen defentsarako borondatea, eta aurrera egiteko dagoen erasorako beharra».