Familian egiteko moduko plana antolatu du Mundarro Kirol Elkarteak iganderako. Mendaur mendira egingo dute goiz pasa gazte nahiz helduek, eta horretarako, goizeko 08:30etan abiatuko dira Joseba Barandiaran plazatik.
Izenematea gaur arte, Kiroldegian
Parte hartu ahal izateko, ezinbestekoa izango da aurretik izena ematea. Horretarako, hiru egun jarri zituen kirol elkarteak, eta gaurkoa izango da azkenekoa. Kiroldegiko harreran edo, emailez, kiroldegia@astigarraga.eus helbidearen bidez egin daiteke.
Egunotan izena ematen dutenen arabera erabakiko da kotxe partikularren bidez edo autobusez bertaratuko diren irteerako puntura.
Ibilbideak, bi atal
Aurtitzetik (156 metro) abiatuta, bi ataletan burutuko dute ibilbidea. Ume txikiak dituztenentzat Iturendik urtegiraino egitea gomendatu dute; besteek, urtegitik mendi gailurrera segituko dute, bi orduz.