Ereñotzuko Udazken Kulturalaren agenda edo programa argitaratu da eta datorren ostegunean hasiko da lehen emanaldi batekin. 29garren edizioa betetzen du eta Eli Pagola eta Eneka Gorrotxategi: Hego Ameriketako bidaien irudi emanaldiak emango dio hasiera. 19:00etan eskainiko da Auzo Udaleko aretoan.
Datorren astean bigarren ekitaldi bat ere egongo da. Ostiralean, urriaren 20an, 22:00etan, Igelak filma eskainiko da Auzo Udaleko aretoan.
Aranora igoera eta festa
Datorren larunbatean, urriaren 21ean, 11:00etan Aranora igoera bizikletaz egingo da. Irteera Ereñotzuko semaforotik egingo da. Eta astea amaitzeko, igandean, 17:00etan, Auzoko Festa antolatuko da frontoian. Bertako sagardoak dastatu eta gaztain erreak jateko aukera egongo da; produktuen azoka eta patata tortilla lehiaketa ere egongo da.
Urrairen 26an eta 28an, beste bi ekitaldi
Urriaren 26an, osteguna 19:00etan, Hernaniko eta inguruetako anfibioak eta narrastiak gida-liburua aurkeztuko dute Egoitz Alkorta eta Iñaki Sanz-Azkuek.
Urriaren 28an, berriz, larunbatarekin egunpasa egingo da Legazpiko Mirandaola Burdinolara. Ondoren bazkaria izango da, Zerainen. Autobuserako eta bazkaritarako txartelak salgai daude, dagoeneko: 30 euro balio dute helduentzako, eta 15 euro, 14 urtetik beherakoentzako. Bi urtetik beherakoentzako debaldekoa izango da.
Azaroaren 26ra arte iraungo du Udazken Kulturalak
Osteguneko irudi emanaldia izango da Udazken Kulturalaren barruan aurrenekoa, baina ez azkenekoa; azaroaren 26ra bitarte, beste hainbat ekitaldi desberdin antolatu dira.
Ekintzetan parte hartzeko 943 55 10 00 telefonora deitu behar da; astelehenetan goizez 09:00etatik 11:30etara edota arratsaldez 18:00etatik 20:00etara eta asteartetik ostiralera 9:00etatik 13:00etara.