Bikain hasi zuten Gipuzkoako Txapelketa, nagusien 1go mailan, Harri Loidik eta Jokin Santxezek; baina okertu egin zaizkie gauzak, azkeneko bi jardunaldietan: galdu egin zuten Tolosaren kontra, Gurutzealdek (Loidi kanpoan izan da azken asteotan) eta Santxezek; eta ezin izan zuten aurkeztu Intzaren kontrako partidura, lasartearrek ostiralean bakarrik zeukatelako jokatzeko aukera, eta Gurutzealdek Euskadiko Trinkete Txapelketakoa zeukalako egun horretan.
Horregatik, partidu garrantzitsua dute biharkoa. Oiarpe hartuko dute Txomiñene frontoian, goizeko 10:00etan. Bueltan izango da Loidi, eta irabazi beharra daukate astigartarrek; biharkoa, eta baita azkenekoa ere, datorren asteburuan.
Izan ere, hiru garaipenekin berdinduta daude lau bikote, Hernani liderraren atzetik (lau garaipen dauzka); eta bi bikotek bakarrik lortuko dute semifinaletara pasea, ohorezko mailara igoera jokatzeko. Beraz, azkeneko bi partidu hauetan jokatuko dute semifinaletara pasea.