Donostiako Zinemaldian agerraldi arrakastatsua egin eta hilabete batera, zine aretoetara iritsi da Jon Garañoren Handia filma. Atzo estreinatu zuten, Euskal Herriko eta estatuko zineetan, eta beraz, dagoeneko aukera dago, Zinemaldian bi sari lortu zituen pelikula ikusteko: Epaimahaiaren Sari Berezia, eta Euskal Zinearen Saria.
Aurre-estreinaldia, asteartean Tolosan
Atzo estreinatu baino lehen, hala ere, aurre-estreinaldia egin zuten Tolosan, Leidor zine aretoan, asteartean. 630 ikusle izan ziren bertan, eta horietatik 150, altzotarrak. Bertan izan ziren Jon Garaño eta Aitor Arregi zuzendariak, eta Eneko Sagardoy eta Joseba Usabiaga aktoreak, besteak beste: «oso gau berezia izan da», azaldu zuten saioaren ondoren.
Migel Joakin Eleizegi Altzoko Handiaren historia du oinarri filmak; gaitz baten eraginez 2,42 metro neurtzera iritsi, eta herrialdez herrialde erakustaldiak egiten ibili zen gizona, kontinenteko gizonik altuena zelako. Bere bizitza eta anaiarekin zeukan harremana lantzen ditu filmak, ordubete eta 54 minutuko iraupenarekin.