Eztabaida haundia sortu du, Gipuzkoako Foru Aldundiak aurkeztu duen aurreproiektuak, Buruntzaldeako autobus zerbitzu publikoaren lizitazio berrirako. Eta Udaletako ordezkariek zein autobus zerbitzuetako langileek agerraldiak egin ondoren, Aldundiaren ikuspegia azaleratu du Marisol Garmendia Mugikortasun zinegotziak ere: «ez dugu linearik kenduko. Jende gehien ibiltzen den orduetan, zerbitzua indartu eta bermatuko dugu, baita zerbitzu bereziak eta ospitale, unibertsitate eta lantokietarako zerbitzuak ere. Egunaren gainerakoan, eskaintza berrantolatuko dugu, zerbitzua benetako mugikortasunera egokitzeko», adierazi du.
Garmendiak azaldu du, bestalde, «30 urteren ondoren, oraindik berritu ez den Lurraldebusen linea bakarra» dela Buruntzaldeakoa, «nahiz eta aspaldi berritu behar zen. 30 urte daramazkite hiru enpresak linea hori kudeatzen, eta panorama judiziala argitu ondoren, beharrezkoa da zerbitzua berritzea, linea horretan edonolako hobekuntza egin ahal izateko».
Diputatuak adierazi duenez, jende gehieneko orduetan, autobus gehiago edo haundiagoak jarriko dira; eta erabilera gutxineko orduetan, berriz, ordutegiak moldatu: «zerbitzua arrazionalizatu behar da, eta horixe egiten ari gara, gaindimentsionatua zegoen linea batean».
«Erabiltzaileak aztoratzen ari da Bildu; guztia geldiarazi nahi du, aztertu gabe»
Modu berean, Garmendiak EH Bilduri leporatu dio, «erabiltzaileak aztoratzea eta duela 30 urte baino gehiagotik emakida hori ustiatzen ari diren enpresen tesiak babestea. Funtsik gabeko beldurra sortu nahi du, asmo politiko argiarekin. Ez da egia linearen bat kenduko dugula, eta ez dugu langilerik kaleratuko. Bilduk guztia geldiarazi nahi du; gauzak dauden moduan nahi ditu, ondo edo gaizki dauden aztertu gabe», kritikatu du.
«30 urteren ondoren, oraindik berritu ez den linea bakarra da Buruntzaldeakoa».
Diputatuak azaldu du, autobus, erabiltzaile kopuru, ordutegi eta zonei buruzko datuekin osatu duela aurreproiektua; eta orain, jasotako alegazio eta ekarpenak aztertu, eta zerbitzua hobetzeko egoki iruditzen zaizkionak txertatuko dituela, baita iraila eta urriko datuak kontuan hartu ere: «prozesuari 2018ko maiatza edo ekainean emango zaio bukaera, eta jasotako alegazioak txertatu ondoren, amaierako proiektua hobetuko da», aurreratu du Garmendiak.