Eskola komunitateak pasa den urteko aritik tiraka lan baldintzak hobetzearen bidean erreibindikazoekin jarraitzen dute. Honela mugimendu horren bueltan, beste hainbat ekintza ere egingo dira. Aurrenekoa gaur izango da; Buruntzaldeako aldarrikapen jaia egingo dute Atsegindegin, ELA, LAB eta Steilas sindikatuek deituta. Eskolatik aterata izango da, 17:00etatik aurrera.
Lan baldintzak hobetu, hezkuntza eraiki! lelopean antolatu dute festa aipatutako sindikatuek, eta denetik izango da horretarako: ipuin kontalaria, bertsolariak, word kafea, marrazkiak egiteko aukera... Kafea, txokolatea eta pasatak ere egongo dira, itxialdietan bezala.
Mobilizazioekin jarraituko dute
Urte beroa izan zen aurreko urtekoa eskola komunitatearentzat. Hainbat greba egun izan zituzten, eta aurten ere, ildo beretik jarraitzeko asmoa plazaratu dute urte hasieratik. «Irakaskuntza publikoan, jasaten ari garen lan baldintzen kaxkartzea, murrizketak eta hezkuntza politika salatu asmoz udazken honetarako hainbat mobilizazio iragarri ditugu» diote sindikatuek.
Urrian zehar ikastetxe desberdinetan itxialdiak burutu dituzte. «Itxialdien helburua aldarrikapen eta jai giroan hezkuntza komunitate osoak, herritarrekin batera hezkuntza publikoan jasaten ari garen egoera hausnartu eta erantzun eta alternatibak partekatzea da».
Programatuta dagoenaren arabera, azaroan zehar izango dira greba guztiak; ostegunero eskola komunitatearen parte den sektore batek egingo du, eta ondoren, abenduaren 12an izango da komunitate osoaren greba.
EGITARAUA
17:00 Ekitaldiari sarrera emango zaio.
17:15 Word kafea langile eta familientzat hezkuntza publikoak egun bizi duen egoeraz mintzatu. Gaur egungo eta etorkizuneko Euskal Hezkuntza Publikoari buruz jardun eta hausnartzeko aukera.
17:15 Haurrentzako tailerrak.
18:30 Ipuin kontalaria.
19:00 Word kafean atera diren ideiak, ekarpenak komunean jarri.
19:20 Bertso saioa ekitaldia amaitzeko.