Bastidan hasiko du finalerako bidea, Agin Laburu astigartarrak, Bertsolari Txapelketa Nagusian. Urriaren 28an, finalerdietako aurreneko saioan, ariko da astigartarra, beste bost bertsolarirekin batera: Igor Elortza, Sustrai Colina, Jon Martin, Jone Uria eta Nahikari Gabilondo.
Ez du lan erraza izango Laburuk, baina konfiantzarekin joango da behintzat. Izan ere, final laurdenetan bosgarren puntuaziorik altuena lortu du berak; eta sei saioetako irabazleak kenduta, berak jaso du puntu gehien (686 puntu). Are gehiago, Jon Martinek berak, Segurako saioa irabazita ere, puntu gutxiago lortu zituen (673,5 puntu).
Elortzak eta Colinak, berriz, aurreneko saioa izango dute, semifinaletan sartu baitira, orain lau urte finalista izan zirelako. Baina bost horiek ez ditu izango kontrario Laburuk, 24 bertsolarietatik puntuazio onena lortzen duten zazpiak pasako baitira... bi saioetako puntuak batuta. Izan ere, bi itzulitara jokatuko dira semifinalak. Aurreneko saioan puntu gutxien lortzen dituzten seiak kanpoan geratuko dira, eta beste 18ek, bigarren saio bat jokatuko dute, multzoak aldatuta. Bietako puntuak batuta, gehien lortzen dituzten zazpiak, Barakaldoko finalean ariko dira, Amets Arzallusekin batera, abenduaren 17an.
Finalerako sarrerak dagoeneko bukatu dira, baina Bastidako saiorako, erosi daitezke www.bertsosarrerak.eus web orrian, oraindik ere.
Bertso afaria Zipotzan, azaroaren 10ean
Eta Bastidako saioaren ondoren, bigarrenaren zain, Astigarragan ere kantatuko du Agin Laburuk. Bertso afaria antolatu dute azaroaren 10ean, Zipotza elkartean, iluntzeko 20:30etan hasita. Sarrerak salgai daude dagoeneko, 20 euroan, Zipotza tabernan.
Laburuk eta Unai Agirre hernaniarrak jarriko diote saltsa afariari. Agirrek ere egin du aurrera Bertsolari Txapelketa Nagusian, eta azaroaren 1ean izango du saioa, Irunen, Maialen Lujanbiorekin batera, besteak beste.