Urte erdiko lanaren ondoren, Hernani Erabaki aurrekontu partehartzaileen prozesua iritsi da azkeneko fasera. Gaur hasi, eta azaroaren 12ra arte, 16 urtetik gorako hernaniarrek (hau da, herrian erroldatuta daudenek), aukeratu ahal izango dute zertan inbertitu nahi dituzten, duela lau urtetik urtero herritarren proposamenen esku geratzen diren 500.000 euroak.
39 proposamenetik, 10 aukeratu
Hasieratik erabili den metodologia burutuko da, aurten ere. Hori horrela, aurreko astean aurkeztutako 39 proposamenetatik, bukaerara iritsi diren horietatik, 10 aukeratu beharko ditu herritar bakoitzak, ez gehiago, ez gutxiago; bestela, boto baliogabetua izango baita.
Bi bide izango dira bozkatzeko: erabaki.hernani.eus webgunearen bidez, edo etxeetara bidalitako diptikoa bete eta udal eraikinetan jarri dituzten postontzietan sartuz.
Proposamenak, gainera, auzoz auzo aurkeztuko dira. Aurreneko zita udaletxean izango da etzi, 19:00etan.