Egun berezia izango da datorren ostiralekoa, erremontearentzat. Urtero bezala, pelotari onenak errekonozituko dituzte, baina aurten, ekitaldi haundia prestatu dute horretarako: erremonte partiduak, musika, jan-edana eta sorpresa ugari. Izan ere, Erremontearen Eguna ospatuko dute, aurrenekoz, otsailaren 16an.
Arratsaldeko 17:45etan hasiko da festa, musikarekin: zuzenean joko dute Hego Haizea taldeko kideek, Joana Ortega eta Sebi Uztarrozek.
Eta ordu laurden beranduago, emango diote hasiera erremonte lehiari: txapelketa azkarra jokatuko dute, lau bikoteren artean. Bi semifinal izango dira, 20 tantora bakoitza; eta irabazleek, finala jokatuko dute gero, 25 tantora.
Aurreneko semifinalean, Matxin IIIrekin ariko da Endika Barrenetxea hernaniarra, Uterga eta Agirrezabalaren kontra. Bigarrenean, berriz, Urrizak eta Azpirozek jokatuko dute, Ezkurra II eta Ionen kontra.
Sorpresak, partiduen artean eta bukaeran
Jaialdian zehar, gainera, sorpresa ugari izango dira. Horietan aurrenekoa, bi semifinalen artean izango da; eta bigarrena, finala baino lehen, opariak zozketatuko baitituzte, bertaratuen artean. Orduan banatuko dizkiete sariak, 2017 urteko onenei ere: Xanti Utergari, A multzoko erregularrena; eta Xabier Azpirozi, B multzoko erregularrena. Eta sari potoloena ere banatuko dute: Urrezko Erremontea.
Finalaren ondoren, beste sorpresa batekin erakutsiko diete esker ona bertaratuei, eta bukatzeko, luntxa eta edaria izango dira doan.
Bertan banatuko dizkiete sariak, 2017ko onenei.
Gonbidapenak doan, emailez edo telefonoz
Egun horretarako, gonbidapenak eskatu daitezke doan. Horretarako, bi bide jarri dituzte aukeran: 943 55 24 57 telefono zenbakira deitu, edo oriamendi2010@gmail.com helbide elektronikora idatzi.
«Pelota bizitzeko beste modu bat izango da, animatu eta lortu zure gonbidapena! Zure zain egongo gara!», luzatu diete gonbitea denei.
Gaur ere, jaialdi berezia
Ostiralekoa baino lehen, biziko du beste jaialdi berezirik ere, Galarretak. Gaur arratsaldeko 16:00etan hasita, lau partiduko jaialdia prestatu dute; eta bigarrenean, Urriza eta Barrenetxea IV ariko dira, hirukote baten kontra: Ezkurra II, Matxin III eta Ion.