Iritsi da Hernaniko Xake Elkartearen zita urteko garrantzitsuenetako bat: Hernaniko Xake Txapelketa. Gaur hasiko dira partidak, eta bi hilabetez jokatuko dituzte.
Beti bezala, arratsaldeko 16:00etatik aurrera, igandero jokatuko dituzte partidak, aurten, azaroaren 26ra arte. Gainera, nobedade potolo bat izango da, oraingoan: eszenatokiaren aldaketa. Izan ere, Zumitza izaten zen xakezaleen topagune Hernaniko txapelketan zehar, baina hura itxita dagoenez, Kixkal tabernak hartu dio lekukoa.
Oraingoz, hamasei partaidek eman dute izena, baina jokalari gehiagorentzako tokia badagoenez, gaur bertan izena emateko aukera izango dute bertaratzen direnek, han bertan zozketa egin arte.
Jokatzeko moduan, aldaketarik ez
Lekua ezaguna ez, baina jokatzeko modua aski ezaguna izango dute partehartzaile beteranoenek. Joko sistema suitzarra erabiliko dute, hain zuzen, maila berekoek elkarren aurka jokatu dezaten.
Horrez gain, aurreko urteetan bezalaxe, bi atseden eskatzeko aukera izango da, baita, partaideek hala erabakiz gero, astean zehar jokatzekoa ere.