Azken urteotan, gizartearen zaharkitzearekin batera, gora egin du menpekotasuna duten pertsonen zaintzaileen kopuruak, eta horiei laguntzen saiatzen dira Hernaniko Zerbitzu Sozialetako lankideak. Bide horretan, Pertsona helduen jokaera aldaketei aurre egiteko baliabideak tailerra eskaini zuten 2010 eta 2014garren urteetan, eta garai horretan izandako arrakasta ikusita, aurten ere errepikatzea erabaki dute.
Hain zuzen, hilaren 23, 24 eta 25ean burutuko dituzte ikastaroari dagozkion saioak, arratsaldeko 16:30etatik 19:30etara, Biteri kultur etxean.
Hernaniko Udaleko Zerbitzu Sozialetako sailak antolatu du Lahar Elkargoarekin elkarlanean. Eta jakinarazi dutenez, pertsonalki gonbidatu dituzte menpekotasuna duten 325 hernaniarren zaintzaileak.
Izenematea, beharrezkoa
Nahiz eta ikastaroa debalde izan, aurretik izena ematea ezinbestekoa izango da parte hartu ahal izateko. Horretarako, harremanetarako bi bide jarri dituzte: 943 557 854 (Zerbitzu Sozialak) edo 663 05 72 23 (Lahar elkargoa).
Metodologia partehartzailea
Lau gairen inguruan osatu dute ikastaroa: dementzien definizioak; giza jokaera eta ikuspegi konduktuala; jokaera arazo zehatzen aurrean jarraibideak; eta adineko pertsonekin suertatu daitezkeen bestelako arazoei nola aurre egin. Horiek guztiak metodologia aktibo eta partehartzailea erabiliz landuko dira lau egunetan.