Hutsune baten ondoren, bueltan da Hernaniko Gazte Eguna. Oraingo honetan, herriko gazte eragile guztiak batu eta Gazte Mugimenduaren Koordinadora sortu dute, biharko Gazte Egunarekin emango diote hasiera beren lanari.
Goizetik gauera arte, zeregina
Bihar goizeko 11:00etan emango diote hasiera egunari eragileen aurkezpenarekin. Denera, 11 eragilek osatzen dute Gazte Mugimenduaren Koordinadora, eta tarte horretan, bakoitzak bere burua eta martxan dauzkaten proiektuak aurkezteko aukera izango dute. Ondoren, 12:00ak aldera hasiko da festa, txupinazo antzeko batekin.
Eguerdian, aurretik txartela erosi dutenekin, bazkaria egingo dute, ohiko bazkalostearekin seguraski luzatuko dena. Horiek guztiak Tilosetan izango dira eguraldiak laguntzen badu, eta bestela, Gaztetxean egingo dira.
Eztabaida eta jam session gaur, biharko beroketa
Gaztetxean bi zita izango dira; 18:30etan eztabaida, eta 22:00etan mikro irekia.
Gazte Eguna izango da biharkoa, Hernanin, baina gaurko beste bi zita jarri dituzte, beroketa moduan: eztabaida batetik, eta jam session bestetik. Gaztetxean izango dira biak.
Batetik, 18:30etan hasita, gazte mugimenduaren bilakaera izango da eztabaidagai. Bestetik, jam session eta mikro irekia izango dira, 22:00etatik aurrera. Lehendik ere egin bada ere, oraingoan Gazte Egunarekin bat egin dute nolabait. Baina aurrekoan bezala, mundu guztia animatu dute parte hartzera.
Arratsaldeko 19:00etan elkartuko dira gazteak beren aldarrikapenak manifestazioan kaleratzera. Eta bukatzeko, Zartako-k eta Patxuko Nice taldeen kontzertuak izango dira, baita DJa ere.