Errausketaren aurkako mugimenduak 2garren Barraskilo Operazioa antolatu du hurrengo, urriak 26, ostegunerako. Karabana 18:00etan abiatuko da Decathlonetik eta Lasarte, Zizurkil, Villabona, Andoain, Urnieta, Hernani, Añorga eta Antiguo zeharkatuko ditu.
Erraustegiaren obren berehalako lan uztea eskatzen du errausketaren aurkako mugimenduak eta «borondate politikoa eskatzen diogu hondakinen gaiari irtenbide merkeago eta justuago bat emateko. Norabide horretan ausardiaz jokatzeko deia luzatzen diegu bultzatzaileei eta interes pribatu eta partikularrak alde batera utzi eta gipuzkoarrontzat komenigarriagoak diren neurriak hartzera gonbidatzen ditugu».
Erraustegiaren aurkako mugimenduak hondakinen gaian badagoela alternatiba deritzo, «herri askotan aurrera eramaten ari da eta bataz beste %70 eko gaikako bilketa lortzen da, udalerri batzuetan %90era ere iritsiz. Dinamika horretan azken udalerri batzuk batu dira, Urretxu (EAJ) eta Zumarraga (PSE-EE) kasu».
Bi herri hauetan alderdi guztien adostasunarekin gaikako bilketako %45 estandar batetik %70era pasatu dira hondakin bilketan aldaketak eginaz eta eraginkortasunera joaz txipdun edukiontzi grisa, astean bi irekierarekin, aldaketa egina.
«Adostasunak lortu dira eta bultzatu behar dira»
«Ikusten denez aldaketa txiki batzuek berehalako emaitzak ekarri dituzte eta gainera denetan interesgarriena hiru alderdi nagusien artean (PSE-EE, EAJ eta EH Bildu) adostasuna lortu dutela izan da. Hortaz alternatiba martxan da Gipuzkoako zati batean, mugimendutik eskatzen diegu ausardia politikoz jokatu eta neurri eraginkor horiek Gipuzkoa osora zabaltzea, batez ere biztanle askoko guneetara. Neurri eraginkor horiek probintzi guztian zabalduta errefux tonak asko murriztuko lirateke eta erraustegi garesti eta toxikoa ezereztatuko lukete, bide merkeago eta osasuntsuagoak ahalbidetuz» diote erraustegiaren aurkako mugimendutik.
Bigarren barraskilo operazioan hori aldarrikatu nahi dute, «alternatiba badagoela, egingarria dela eta gainera merkeagoa eta osasun bermeak errespetatzen dituela».
Herri desberdinetatik igaroko da karabana
Bigarren karabana honek badu beste berrikuntzarik. Oraingoan autobidea kolapsatzea ez da izango helburua. «Oraingoan zirkuitoa haunditu dugu herri gehiagotan gure aldarria presente izateko».
Ainhoa Intxaurrandietari eta Iñaki Errazkini babesa
Erraustegiaren aurkako mugimenduak babesa, maitasuna eta sustengua adierazi nahi diete Ainhoa Intxaurrandietari eta Iñaki Errazkini. «Herritarren autua bete zenuten, erabaki zuzena hartu zenuten eta gainera adostutako indemnizazioak ordaindu ziren, legeak eskatzen zuen bezela. Lurraldeari dirutza aurreztu zenioten gaindimentsionatuta zegoen proiektua atzera botaz, osasuna bermatu zenutuen, eskerrak ematen dizkizuegu horregatik».