Eskualde mailan ere egingo dute Euskararen Ginkana aurten, eta Buruntzaldeak izango du berea. Elkarlanean antolatu dute, Kutxa Ekoguneak, Buruntzaldeako herrietako Euskara Zerbitzu eta Gaztelekuek, eta Euskaltzaleen Topaguneak; eta helburua da, «euskerarekin eta euskeraz dibertitzea».
Izena emateko epea, zabalik
12 eta 26 urte arteko gazteei zuzendutako lehiaketa da Buruntzaldeako Euskararen Ginkana, eta aurreneko edizio honetarako, dagoeneko zabalik dago izena emateko epea, urriaren 19ra arte. Internet bidez apuntatu behar dute: www.euskerarenginkana.eus. Eta bertan dago lehiaketari buruzko informazioa ere.
Edozein kasutan, Hernaniko Gaztelekuan edota Euskara Zerbitzuan ere emango dituzte argibideak, eta baita taldeak osatzen lagundu ere.
Izan ere, lau laguneko taldetan eman behar da izena, taldeka lehiatuko baitira, Ginkanaren proba ezberdinetan. Aurreneko probak, internet bidez egingo dituzte; eta lau talde onenen artean egonez gero, abenduaren 1ean jokatuko dute finala, Orona Ideon. Sari potoloak jasoko dituzte, Euskararen Ginkana honetako bi talde onenek!