Iritsi da bakailua Hernanira, beste urte batez; eta baita gelditzeko iritsi ere: bi asteko egonaldia egingo du aurten, gaur hasi eta urriaren 22ra bitarte. Eta ekintza askotan izango da protagonista, gainera, epe horretan.
Gaur bertan, hainbat zita dauzka Bakailu Asteak, martxan jartzeko. Batetik, tabernen arteko bakailu pintxo lehiaketa hasiko da, eta hilaren 20ra arte izango da aukera, 23 tabernatako pintxoak probatu (1,5 euro bakoitza), eta azkeneko egunean onena aukeratzeko.
Gaur egingo dituzte bakailu tailerrak ere, Basque Culinary Centerren. 18:00etan hasi eta 20:30ak arte, bakailua sukaldatzen ikasiko dute 32 lagunek.
Eta gaurtik aurrera, beraien menuan edo kartan jarriko dute bakailua, Errioguarda, Iturralde eta Sansonategi jatetxeek; eta erakusleihoak tematizatu, komertzioek.
Bisita gidatua, ostegunean
Ostegunean izango da hurrengo zita, eta bisita gidatua egingo dute 11:30etan, Hernaniko hirigune historikoan. Gazteleraz izango da, eta ez da izena eman behar aurrez. Bai ordea, urriaren 18an Albaolara egingo duten bisitan, eta 22ko bakailua pil-pil eran lehiaketan. Igande eta astelehenera arte dago epea, hurrenez hurren: Biteriko turismo bulegoan, 943 33 70 28, gurutze-a@hernani.eus edota turismoa@hernani.eus.